Fuxe o rei, poñamos fóra a Monarquía

A Monarquía corrupta é un dos piares do réxime que impide ás nacións do Estado a súa autodeterminación

A fuga do rei “emérito” Juan Carlos I representa á perfección o desprezo da Coroa española polos pobos e clase traballadora do Estado. As súas corruptelas, que son as que fan fuxir ao Borbón, son parte estrutural do sistema de poder político-institucional que, amparado polo poder xudicial e mediático, xestionou a Transición.

Nos últimos anos fíxose imposible ocultar o que a prensa internacional e diversos xornalistas represaliados contaban sobre a fortuna de Juan Carlos I, e as últimas investigacións xudiciais afondan no mesmo.

Dende Cerna, sumámonos á cidadanía e forzas políticas democráticas esixindo, canto menos:

– comisión de investigación no Congreso dos Deputados sobre as actividades do anterior Xefe de Estado.

– promover unha consulta – tendo en conta para os tempos a evolución da pandemia – sobre o modelo de Estado, coa opción de escoller a fórmula de República.

– recoñecemento do dereito de autodeterminación dos pobos.

– revisión do Código Penal en relación ao delito de inxurias á Coroa.